әскери коммуникация

(Военные коммуникации; лат. communicatio, communico — байланыстырамын, сөйлесемін)

әскерлердің қозғалысы үшін, қару-жарақ пен әскери техника, оқ-дәрілер, жанармай және басқа материалдық құралдар тасымалдау үшін, сондай-ақ эвакуацияның барлық түрлерін жүзеге асыру үшін дайындалып жабдықталған байланыс жолдары. Көліктің әр түрінің құрамды бөлігі болып табылады. Ә.к. құрлықтық, судағы және әуедегі болып бөлінеді. Құрлықтық әскери қарым-қатынастарға темір жолдар, автомобиль және арқан бойымен жүретін жолдар, құбырлар, судағы Ә.к-ға — порттар, жүзудің қауіпсіздігін қамтамасыз ететін гидротехникалық құрылыстар мен жүзу құралдары бар теңіз, өзен, көл және басқа жолдар; әуе жолдарына — ұшақтар мен тікұшақтардың ұшуы үшін салынған әуе трассалары, жабдықталған аэродромдар, ұшақты жүргізу және ұшуды қамтамасыз етудің жер үсті радиотехникалық құралдары жатады. Ә.к. үнемі жұмыс істеп тұрады, оның күзеті мен қорғанысы ұйымдастырылады. Ә.к. стратегиялық, оперативтік, тактикалық болып бөлінеді. Жабдықтарына қарай әскери қарым-қатынастар – орталық, маңдайшептік, армиялық, корпустық және жауынгерлік болып, бағытына қарай жаппай, яғни маңдайшепке параллель жүретін қарым-қатынас болып бөлінеді. Ә.к. жүйесін дамыту көптеген елдерде әскерлердің қысқа мерзімді таратылуын, олардың ұрыс қимылдары аудандарына уақытында жылжуын, бір бағыттан екінші бағытқа қайта топтауды қамтамасыз ету және ұрыс қимылдары барысында әр түрлі материалдық құралдарды жеткізу мақсатында жүргізіледі.